Kun halimbawa, isa ka adlaw, may nakit-an ka nga gulpi lang nagdaku ang kuwarta sa imo nga bank account, gastuhon mo bala gihapon ini bisan indi imo?
Amo ini ang kaso sang South African student nga si Sibongile Mani sang 2017.
Naga-eskwela pa lamang ini sa kolehiyo kag ginahatagan sang monthly food allowance nga P4,400 bangud nga benepisyaryo siya sang National Student Financial Aid Scheme.
Ginapadala sa ila ang allowance paagi sa Intell mali ukon isa ka kumpaniya nga ang specialization amo ang payment kag administration of funds.
Isa ka adlaw, may error nga natabo kag nagsulod sa account ni Mani ang P44 million.
Wala na ini sang gin-uyang nga tyempo kag gingasto na ang P2.5-million sa sulod lamang sang duha ka bulan.
Lakip sa iya ginbakal amo ang handbags, jackets, habol, bath sheets, alcoholic drinks, kag mga sigarilyo.
Apang nabisto siya kag tinuig ang nakaligad, gindagdagan ini sang sentensya sang East London Regional Court sa South Africa.
Lima ka tuig ini nga pagka-preso bangud sa kaso nga theft.
Gin-apelar sini ang kaso kag ginhatagan na lamang sang “wholly suspended five-year sentence” apang lakip sa kondisyon amo nga indi ini dapat makasuhan sang theft kag fraud.
Indi man ini pwede makaguwa sa iya hometown kun wala sang approval sang correctional services kag kinahanglan man sini magpaidalom sa three-year correctional supervision kag 576 hours community service nga wala sang compensation. Magluwas diri, ginmanduan man ini nga magpaidalom sa counseling.
Nagpadalagan man ini anay bilang treasurer-general sang isa ka unibersidad sa South Africa apang nagdesisyon nga indi siya pagpapungkuon sa pwesto bangud sa iya nga kaso.
