KORONADAL CITY – Nagapadayon ang imbestigasyon sang kapulisan sa pagpanghaboy sang granada sa SR. Sto. Niño Chapel, Rosary Heights 3, siyudad sang Cotabato nga nagresulta sang pagkapilas sang duha ka indibidwal.
Ini ang ginpahayag ni Col. Querubin Manalang Jr. sa interview sang Bombo Radyo.
Suno kay Manalang, alas-11:00 sang aga, Domingo nga adlaw sang nagluntad ang insidente samtang ginapatigayon ang isa ka pagtililipon sa kapilya.
Naguwa sa imbestigasyon sang kapulisan nga samtang nagapatigayon sang aktibidad sa kapilya nag-agi ang nakamotorsiklo nga suspek kag ginhabuyan sang isa ka hand grenade ang sulod sang chapel nga gilayon nagsigabong kag nagtuga sang pagkapilas sang duha ka indibidwal.
Ang mga biktima ang ginalakipan nanday Marivel Atis, isa ka 40 anyos nga babaye kag Rosita Tubilo, isa ka 65 anyos nga babaye nga lunsay mga residente sang RH 3 kun diin nag-angkon ang mga ini sang minor injuries nga gilayon naman gindala sa Cotabato Regional Medical Center.
Gilayon naman nagpalagyo ang mga suspek matapos himuon ang krimen.
Samtang, palaisipan pa sa mga otoridad kung ano ang motibo sang mga suspek kun ngaa ginhabuyan sang granada ang kapilya samtang may mga tawo nga nagatililipon.
Hugot naman nga ginkundenar sang mga otoridad kag sang pamunuan sang Cotabato City LGU ang natabo labi na nga mga inosente nga sibilyan ang biktima.
Gin-awhag naman sang Cotabato City PNP ang mga pumuluyo nga mangin vigilante kag alerto sa tanan nga tion agud indi na masulit pa ang insidente..
