KORONADAL CITY- Nagdagsa ang madamo nga mga blood donors subong nga adlaw halin sa nagkalain-lain nga mga lugar sa South Central Mindanao para sa tuigan nga Dugong Bombo 2018.
Nahibaluan nga subong nga tuig mas nagdamo ang nagpahayag sang ila interes kag kaluyagan nga makadonar sang dugo bangud napamatud-an nga dako ang mabulig sini ilabi na sa mga tion sang emerhensya nga nagapanginahanglan sang suplay sang dugo.
Suno kay Philippine Red Cross South Cotabato chapter administrator Erwin Del Carmen, madugay na nga partner sang Philippine Red Cross ang Bombo Radyo Philippines kun sa diin ang pinakamadinuguon nga blood letting campaign nga ini ang nagsugpon na sang madamo nga mga kabuhi sang mga taga South Central Mindanao ilabi na ang may mga balatian nga Dengue, mga igapaidalom sa Dialysis kag iban pa nga may mga malala nga balatian.
Dugang pa sini nga sa 450cc nga dugo nga madonar, 4 ka persona ang masalbar nga kabuhi.
Samtang sa pihak nga bahin indi lamang sa syudad sang Koronadal, igapatigayon ang Dugong Bombo bangud sa Tacurong City, Sultan Kudarat igapatigayon man ang blood letting activity nga suportado man sang lokal nga gobyerno kag madamo nga mga grupo.
