Ginahulat na lamang sang pamunuan sang Department of Social Welfare and Development Region 12 (DSWD-12) lakip man ang iban pa nga mga Regional Office ang mando sang National Government angot sa ayuda para sa mga apektado nga sektor sa tunga sang krisis nga ginapangatubang kasunod sang pagsaka sang presyo sang gatong.
Ini ang ginpahayag ni Director Loreto Cabaya- Department of Social Welfare and Development Region 12 (DSWD-12) sa interview sang Bombo Radyo Koronadal.
Madumduman nga ginpahayag ni Ferdinand Marcos Jr. ang mga tikang sang gobyerno agud mabuligan ang mga sektor nga apektado sang pagsaka sang presyo sang gating bangud nagapadayon nga tensyon sa Middle East.
Ginpahayag sang Presidente nga nagsugod na ang implementasyon sang P5,000 cash relief para sa 139,000 tricycle drivers sa Metro Manila, nga magsugod subong nga adlaw, Marso 17, kag may plano man ang gobyerno nga maghatag sang bulig sa jeepney kag Transport Network Vehicle Service drivers.
Gindugang man sang Pangulo ang mga hagna nga nagatulod sang pagpanubo sang excise tax sa petrolyo kag pag-amendar sang Biofuels Act agud magamit ang mas barato nga bioethanol.
Suno pa sa iya, igapadayon man ang “Love Bus” program para sa libre nga mga komyuter sa Metro Manila, Metro Cebu, kag Metro Davao.
Angot naman sa mga mangunguma kag manugpangisda, magahatag sang P3,000 fuel subsidy ang Department of Agriculture kag Bureau of Fisheries and Aquatic Reasources.
May yara man sang dugang nga P2,000 nga pagabuligan sa idalom sang Presidential Assistance for Farmers and Fisherfolk program humalin sa Abril.
Magahimo man ang Civil Aviation Authority of the Philippines sang mga tikang agud panubuon ang mga charges sa aviation kag padasigon ang proseso sang fuel surcharges.
