KORONADAL CITY – Ginbawian sang kabuhi ang isa ka drug suspect samtang pilason naman ang isa ka agent sang Philippine Drug Enforcement Agent (PDEA) 12 makaligad nga maglab-ot sa engkwentro ang ginpatigayon nga drug buy-bust operation sa Tandang Sora, Barangay Zone lV, Koronadal City.
Ginkilala ang napatay nga si Jeffrey Pudadera, yara sa legal nga edad kag residente sang Navarro Street, Barangay GPS, sa nasambit nga lugar.
Sa interview sang Bombo Radyo Koronadal kay Kath Abad, spokesperson sang PDEA-12, nagbato si Pudadera sa operating team kag naigo ang isa ka PDEA agent nga amo ang nagtulod sa mga ini nga tiruhon man ang suspek.
Bangud sa engkwentro nag-angkon sang malala nga igo sa ulo ang suspek nga gintunaan sang kamatayon sini.
Samtang ang pilason nga agent ang gindala sa balay-bululngan para sa nagakaigo nga pagbulong.
Nakuha sa posisyon ni Pudadera ang anum ka pakete sang ginapatihan nga shabu nga nagabalor sang masobra Php100,000; buy-bust money, isa ka unit sang caliber 9mm, 12 live ammunition, 1 holster, kag mga drug paraphernalia.
Si Pudadera ang konektado sa isa ka grupo nga notoryos kag delikado bangud sa nagabitbit ang mga ini sang armas luthang.
Sa subong, nagapadayon ang inventory sa mga nakuha sa posisyon sang napatay nga drug suspect.
