KORONADAL CITY – Yara sa kritikal nga kondisyon ang isa ka drayber samtang pilason naman ang menor de edad nga sakay sini sang gin-bungguan sang tricycle ang isa ka prime mover sa Gensan Drive, Koronadal City pasado ala-1 subong nga hapon sang Domingo.
Ginkilala ang driver sang tricycle nga si Denmark Bolences, 26-anyos kag residente sang Purok Paglaum, Barangay Cabuling, Tantangan, South Cotabato samtang ang sakay sini amo si Clark Lloyd Panaguiton, 17 yrs old, Purok masagana B, Brgy.Morales, Koronadal City.
Sa interview sang Bombo Radyo Koronadal PMSgt. Fely Bascon, traffic investigator sang Koronadal City PNP, halin sa round ball ang prime mover padulong sa direksiyon sang General Santos City samtang sa opposite direction naman padulong sa Tantangan ang tricycle.
Sandig sa mga nakakita, madasig ang pagpadalagan sang tricycle kag gulpiyada ini nga nag-insert sa lane sang prime mover gani nabunggo sa tire mismo sang mas dako nga salakyan kag naguyod ang mga ini.
Sa panaysayon naman ni Joseph Siodora, residente sang Bo. 5, Koronadal City kag driver sang prime mover, layo pa lamang nakita na sini ang tricycle nga nagatakilid kag madasig ang dalagan gani naglikaw ini apang nalab-ot sa gihapon ini.
Halos wasak ang unahan nga parte sang tricycle kag nagtabog mangin ang unahan nga royda sang tricycle bangud sa kabaskog sang impact.
Gilayon naman nga gindala sa pinakamalapit nga ospital ang drayber sang tricycle nga yara sa ktirikal nga kondisyon matapos nga mag-angkon sang pilas sa ulo kag panga sini.
Samtang, ginkustodiya naman sang Koronadal City traffic ang driver sang prime mover.
