Ginpahanumdom sang Department of Health (DOH) kahapon ang publiko parte sa peligro sa lawas kag ikaayong-lawas nga dala sang pagpepenitensya ukon pagsakit sa kaugalingon subong nga Semana Santa.
Ginpahayag ini ni DOH Assistant Secretary kag Spokesperson Albert Domingo, kasunod sang tradisyonal nga penitensya sang pila ka Katoliko sa Semana Santa, pareho sang paghampak sa likod kag pagpako sa krus bilang simbolo sang ila paghinulsol sa mga sala nga nabuhat.
Suno kay Domingo, ang mga pilas nga resulta sang penitensya ginatawag nga ‘dirty wound’ ukon hugaw nga pilas, nga posible maggikanan sang mikrobyo kag kabangdanan sang impeksyon sa lawas.
Dugang pa niya, bisan ang Simbahang Katolika nagaengganyo nga indi na kinahanglan pa nga pasakitan ukon samaran ang kaugalingon agud lang mapakita ang pagbalik-loob sa Ginoo.
Pero kung indi gid malikawan sang mga tumuluo ang ila tradisyon nga penitensya, ginpahanumdom sila ni Domingo nga siguruhon nga limpyo kag na-sanitize ang ila gamiton sa pagsakit sa kaugalingon agud malikawan ang impeksyon.
Nagpahamtang man siya sang tambag nga hugasan sang maayo gamit ang sabon kag tubig ang mga pilas, kag butangan sang antiseptic ukon iodine, imbes nga magtambog lang sa suba ukon dagat.
