Kumpirmado na ang ini isa ka carnapping ang salakyan sa vehicular incident nga nagluntad kagab-i sa bahin sang Brgy. New Iloilo, Tantangan, South Cotabato.
Madumduman nga ang 18-anyos nga estudyante nga si Khairan B. Esmeringa, residente sang Camella Prima, Barangay San Isidro, Koronadal City, ang nag-report personal sa kapulisan sang Mayo 13, 2025, alas 5:00 sang hapon nga nadula ang iya salakyan nga Toyota Raize nga nagaduag dark gray kag plate number LAP4948.
Suno sa iya pahayag, ginpark niya ang salakyan sa kilid sang 7/11 store sa Agan East, Barangay Sta. Cruz, Koronadal City samtang nagbakal sang pagkaon kaupod ang iya mga abyan.
Ginpabayaan niya ang salakyan nga may yara pa sang yabi sa ignition.
Pagbalik niya sang mga 4:40 PM, nadiskubrehan niya nga nadula na ang salakyan.
Gilayon nga nagresponder ang patrol team, duty investigator, kag intel operatives sang istasyon sa lugar kag nagsugod sang imbestigasyon.
Ginpaguwa man dayon ang flash alarm kag ginpatigayon ang pursuit operation kaupod ang Tantangan Municipal Police Station (MPS) kag 1st South Cotabato Mobile Force Company (SCMFC).
Pasado 6:30 sang gab-i, samtang naga-conduct sang checkpoint ang 2nd Platoon sang 1st SCPMFC sa Barangay New Cuyapo, Tantangan, South Cotabato, nakita nila ang ginreport nga salakyan nga naga-diretso pakadto sa Tacurong City.
Gilayon nga ginlagas ang suspek nga nagmaneho sini kag pagbalik sang suspek padulong Koronadal City matapos mag U-turn, nagresulta ini sa vehicular accident sa Barangay New Ilo-ilo, Tantangan.
Nadakpan ang suspek kag gilayon nga gindala sa balay bululngan para sa medikal nga bulig.
Ginkilala ang suspek nga si Roger Apolinario, yara sa 60 ang pang-edaron.
Padayon pa nga gina-imbestigaran ang identidad sang suspek.
