KORONADAL CITY – Wala sang may nabaton nga pormal nga reklamo ukon protesta ang Regional Committee sa resulta sang Sepak Takraw sa bag-o lamang nagtakop nga Soccsksargen Regional Athletic Association Meet ukon SRAA 2024 sa General Santos City.
Ini ang ginpahayag ni Mr. Magdaleno ‘Jojo’ Duhilag, Regional Sports Coordinator sang South Cotabato sa interview sang Bombo Radyo Koronadal.
Suno kay Duhilag, natapos na ang SRAA 2024 kag may nadeklarar na nga mga nagdaug kag natapos naman ang selection process sang mga athletes nga pagadal-on sa Palarong Pambansa 2024.
Apang, sa tion nga mapalab-ot sa ila, nagpromisa man ini nga pagahatagan sang igtalupangod agud maathagan ang tanan..// Kadungan sini, ginpaathag man ni Duhilag nga sa kada hinampang may gindihon nga guidelines agud mangin balasehan sa pagpili sang mga pinakamaayo nga players nga dal-on sa Palarong Pambansa.
Indi buot silingon suno pa nga nagkampiyon ang athlete sa anuman nga event pareho sang Sepak Takraw indi mangin garantiya sang iya nga pag-angkon sang ticket sa Palarong Pambansa.
Gindugang pa sini nga wala man sila nagkulang sa pagpahangop sini sa mga coaches antes pa man ang SRAA bangud ang nadihon nga guidelines amo man ang ginbasahen sa Municipal, City kag Provincial Meet.
Sa pihak sini, ginpanginbulahan ni Duhilag si JR Escabosa kag ang team South Cotabato sa Sepak Takraw bangud sa ginpakita nila nga abilidad sa paghampang kun ngaa naangkon nila ang kampiyunato.
