Isa ka babaye patay matapos nga banggaon sang isa ka sedan sa atubang sang KCC Mall of Marbel, Koronadal, pasado ala-1 sang kaagahon, Mayo 2.
Ini ang ginkumpirma ni PSMSGT Leo Dimaculangan, Traffic Investigator sa interbyu sang Bombo Radyo Koronadal.
Suno kay Dimaculangan, dead on arrival sa balay bululngan si Juliet Jaco, 39 anyos, samtang pilason naman ang iya bana nga si Benjie Jaco, 48 anyos, nga driver sang tricycle; ang iya utod nga si Judith Ortiz; kag duha ka menor de edad nga 12 anyos kag 9 anyos, lunsay mga residente sang Barangay 6, Banga, South Cotabato.
Suno naman sa ila imbestigasyon, halin ang mga biktima sa lamay sang ila kapamilya sa Barangay Concepcion, Koronadal kag papuli na kuntani sang nabangga sila sang sedan.
Gindangat madason ang mga biktima sa balay bululngan, apang indi na nakaluwas si Juliet.
Ang iban nga mga biktima kag ang driver sang sedan nakaagom sang mga pilas sa lainlain nga parte sang ila lawas.
Dugang pa Dimaculangan, madasig suno pa ang pagpadalagan sang driver sang sedan kag ini nakainom.
Ginpahayag sang pamilya nga magatubang ang driver sang sedan sa mga responsibilidad sang insidente.
Ang mga salakyan subong yara sa kustodiya sang Koronadal PNP Traffic para sa mas madalom nga disposisyon
