Kumpiyansa ang Department of Agriculture (DA) nga may bastante nga suplay sang pagkaon subong nga “ber” months.
Suno kay DA Assistant Secretary Arnel de Mesa, indi lamang mangin bastante ang suplay sang sibuyas, karne sang baboy, manok, baka, kag bugas sini nga “ber” months, kundi husto man ang mangin presyo sini bangud sa importasyon kag maayo nga harvest.
Naka programa na suno sa opisyal ang importasyon sang karne sang baboy, manok kag baka kag amat-amat naman nga nagabalik ang suplay sini sa pungsod.
Sa pihak naman sang halit sang El Niño kag mga kalamidad, maayo naman ang suplay sang lokal kag imported nga bugas.
Bangud sa mga ginahimo nga tikang sang gobyerno, nagalaum ang opisyal nga indi magkulang ang pagkaon kag mangin kasarangan sa gihapon ang presyo sini sa merkado.
