Madinalg-on ang ginpatigayon nga pagsinapol sang Commission on Elections o COMELEC kaupod na ang MILF kag mga security forces agud nga masiguro nga mangin malinong ang Plebisito sang Bangsamoro Organic Law ukon BOL sa Pebrero 6, 2019 sa probinsya sang North Cotabato.
Sa esklusibo nga interbyu sang Bombo Radyo Koronadal kay North Cotabato election officer Jay Gerada, ginkumpirmar sini nga nakig-angot na sila sa mga MILF commanders, PNP kag AFP agud nga masiguro ang kaluwasan sang tanan ilabi na sang mga botante kag mangin man ang mga election inspectors sa ika-2 nga bugso sang plebisito sa Lanao del Norte kag North Cotabato.
Suno kay Atty. Gerada, preparado na ang mga materyales kag suplay para sa elesyon mangin ang mga election officers para sa plebisito sang BOL.
Sa karon, nakaplastar na ang seguridad sa ligar kag preparado na ang COMELEC sa worst case scenario sa adlaw sang Myerkules.
Samatang, gin-awhag man sini ang mga taga- North Cotabato nga maggwa kag magboto sa nasambit nga plebisito.
Nahibaluan nga sa probinsya sang North Cotabato yara sa 39 ka barangay ang magadesisyon sa adlaw sang Myerkules kun ipaidalom ang ila nga lugar sa Bangsamoro Autonomous Region in Muslim Mindanao.
