Nagaabot na sa 95% ang preparasyon sang Commission on Elections (Comelec) para sa una nga parliamentary elections sa Bangsamoro Autonomous Region in Muslim Mindanao (BARMM) nga pagahiwaton sa Setyembre 14.
Suno kay Comelec Chairman George Erwin Garcia, indi maapektuhan sang nagligad nga ambush ang mga preparasyon sang komisyon para sa hapsay kag malampuson nga pagpatigayon sang eleksyon.
Padayon gihapon ang deployment sang mga balota sa nagkalain-lain nga lugar, local preparations sa tagsa ka Comelec office, kag pagpreparar sang mga presinto.
Nakumpleto na ang deployment sa Tawi-Tawi kag Basilan, samtang target sang Comelec nga matapos ang tanan nga balota kag election materials antes matapos ang Agosto.
Sa una nga semana sang Setyembre, preparado na dapat sa tanan nga munisipyo ang mga kagamitan nga gamiton sa eleksyon.
Magapadayon man ang final security briefing sa masunod nga semana kag personal nga magkadto si Garcia sa Bangsamoro Region.
Kaupod niya ang mga opisyal sang Armed Forces of the Philippines, Philippine National Police kag Philippine Coast Guard agod talakayon ang seguridad antes, sa tion kag pagkatapos sang eleksyon.
Ginalauman man nga maglibot ang convoy sa pila ka lugar sa BARMM bilang kabahin sang security preparations.
