Kampante si Manila 3rd District Rep. Joel Chua nga indi magpadala sa bisan ano nga political pressure ang mga mamalidha sa ila pagdesisyon sa duha ka impeachment complaint batok kay Vice President Sara Duterte.
Suno sa iya, samtang nagapalapit ang 2028 elections kag ginakonsiderar sang iban nga frontrunner si VP Sara, ginapanghunahuna man ini sang mga mamalidha.
Apang ginpabutyag niya nga kinahanglan magpili sila kun magpapadala sa kahadlok kag kabalaka ukon magtuman sang ila obligasyon base sa mga alegasyon nga ginahaboy batok sa Bise Presidente.
Nagapati man si Chua nga sa ulihi, ang desisyon sang mga mamalidha ibase sa mga ebidensya nga ipresentar sa mga hearing.
Kun mag-abot man ini sa Senado, amo man ini ang pagahimuon sang mga senador nga magaserbe bilang judges sa nasambit nga impeachment complaint batok sa Bise Presidente.
