Buhawi kag landslide napagkit sa banwa sang Lake Sebu, South Cotabato; pila ka kabalayan ginguba, dalan indi maagyan

KORONADAL CITY – Ginguba sang mabaskog nga hangin ang pila ka kabalayan sa Sitio Lemnongu, Barangay Lamcade, Lake Sebu makaligad nagpanalasa ang buhawi kasunod sang mabaskog nga pagbubo sang ulan.

Suno kay Lake Sebu Municipal Mayor Floro Gandam, nagapadayon sa gihapon ang ocular inspection sa lugar agud mahibaloan ang numero sang mga panimalay nga naguba.

Gilayon man sini nga ginmando nga hatagan sang pauna nga bulig ang mga apektado nga pamilya. Magluwas diri, napagkit man ang landslide kun sa diin pabudlayan ang pagsulod sa mga lugar bangud sa naguba nga mga dalan.

Sa subong nagapadayon pa ang assessment kag validation sa kabug-osan nga damyos nga ginbilin sang nasambit nga kalamidad.