KORONADAL CITY – Kasubong sang iban nga mga investor nga nabiktima sang mga investment scam, luyag sang mga pumuluyo sa banwa sang Banga nga maarestar, mapanabat kag mabalik ang ila nga mga kwarta halin sa nagapakilala nga mga pastor sang tagsa ka mga investment scam.
Isa na diri si alyas Pedro, isa ka seaman nga naganyat mag-invest sa Munificent Ministry investment scam makaligad nakumbinsi sa mga pamulong-pulong ni Ferdinand “Pastor Regie” Bautista.
Suno kay alyas Pedro sa interbyu sang Bombo Radyo Koronadal, madamo nga mga pagpasiguro ang ginhimo sa ila kasubong sang pagbalik sang kwarta nga ila nga gin-invest, apang sang naglabay ang mga panahon, lunsay mga alibi na lamang ang ginasabat sa ila tubtob sa indi na nila ma-contact ang nasambit nga persona.
Dako naman nga pagkanugon kag kaakig ang ila nabatyagan labi na nga mga dalagko nga balor sang kwarta ang ila ginpain diri, labi na nga P1.3 milyon ang gin-invest niya diri.
Nagpabutyag man ini nga manabat si Bautista sa iya ginhimo labi na nga binilyon nga balor sang piso ang naangkon sini halin sa mga nangin biktima sini sa nasambit nga banwa.
