KORONADAL CITY- Ginpanginwala sang kampo sang Bangsamoro Islamic Freedom Fighters o BIFF ang impormasyon nga sila suno pa ang yara sa likod sang pagpasigabong sang Improvised Explosive Device o IED sa South Seas mall sa Magallanes St, Cotabato City sang Disyembre 31, 2018, bisperas sang bag-o nga tuig.
Sa interbyu sang Bombo Radyo Koronadal sa tagpamaba sang BIFF nga si Abu Misry Mama, wala suno pa sila sang kaangtanan sa pagpasigabong kun sa diin indi suno pa dapat ibasol sa ila ang mga nagaluntad nga pagpamomba sa Central Mindanao.
Malain man suno pa ang buot ni Mama bangud isa suno pa sa mga napatay sa Cotabato blast ang hinablos suno pa sini.
Samtang dugang pa ni Mama nga wala suno pa sang labot ang BIFF sa ginaduso nga Bangsamoro Organic Law kun sa diin “wait and see” lamang ang ila nga grupo sa mangin resulta sini apang nagapati ini nga may kaangtanan ang pagpasigabong sang IED sa nagahilapit nga plebisito sa Enero 21, 2019.
Kaangot sini ginpahayag naman ni Moro Islamic Liberation Front vice chair for political affairs Ghadzali Jaafar nga sin-o man ang yara sa likod sang posible nga pagpanabotahe sa BOL ang indi magmadinalag-on.
