KORONADAL CITY – Malipayon apang nasubuan si JR Escabosa, ang gindeklarar nga Best Striker sa Sepak Takraw matapos nga mangin Over-all Champion ang team South Cotabato sa bag-o lamang nagtakop nga SRAA 2024.
Suno kay Escabosa, malipayon siya nga nangin kampiyon sila sa SRAA 2024 apang nasubuan kag indi mabaton nga wala siya kag ang mga upod niya nga na-qualify sa Palarong Pambansa bangud suno pa sa technical guidelines nga ginasunod sang hampang.
Suno kay JR kuntani may pagbag-o sa guidelines kag e-consider sila nga makaupod sa Palarong Pambansa bangud nagpaninguha sila nga makuha ang kampiyunato.
Nahibaluan nga si JR ang estudyante sang Tboli National High School kag ang team sini ang nagrepresentar sang South Cotabato sa SRAA 2024 sa General Santos City.
Nagaapela naman ini sa technical officials kag sa DepEd Region 12 mismo nga hatagan sila sang tsansa nga makaupod sa Palarong Pambansa bisan isa ka regu na gid lamang nila.
Ginpaathag naman sang isa ka coach sang South Cotabato kun ngaa wala napilian bilang representante sang SOCCKSARGEN Warriors nga magrepresentar sa palaabuton nga Palarong Pambansa ang Team sang South cotabato sa sepak takraw apisar nga nagdaog ang mga ini sa SRAA Meet 2024.
Sa interview kay Coach Henry Dagmil sang South Cotabato, ginpahayag sini nga una na nga nakasugtan sang mga coaches nga ang Regu ukon team nga may dyutay sang pierde amu ang pagapilion base man sang Regional Qualification, bout singganon, apesar wala nagkampeon ang isa ka team kun sila ang dyutay nga may napagkit nga pierde, sila sa gihapon ang pilion bilang regu nga maga representar sa SOCCKSARGEN Warriors para sa palarong pambansa nga pagahiwaton sa Cebu.
Mangin ang nasambit nga coach ang nasubuan man sa natabo bangud maayo man ang performance sang Team sang South cotabato sa Sepak takraw kag nalutos pa sini ang mga players sang General Santos City.
Nagpahayag man ini sang kasubo bangud naghatag man sang effort ang team sang South cotabato kag naghanas agud nga ipadaog ang hampang.
