KORONADAL CITY – Nagapadayon ang imbestigasyon sang mga otoridad angot sa nagluntad nga pagpanglabo sa bahin sang Prk. 1-A, Brgy. Landan, Polomolok, South Cotabato.
Ginpahayag ni PCapt. Randy Apostol, ang deputy chief of police sang Polomolok PNP, nagluntad ang nasambit nga insidente pasado alas 12 sang kaagahon kun sa diin ginakaulamiran ini sang mag-amay kun sa diin ginkilala ang mga ini nga sanday Victor Dario, 60 anyos kag bata sini nga si Jay-R, 28 anyos kag isa ka habal-habal driver.
Base sa imbestigasyon, gindala sang biktima nga si Victor ang iya nga kadidang sa ila panimalay sa nasambit nga lugar, apang nakita ini sang iya bata nga si Jay-R kag gilayon nga ginkuhaan sang laragway.
Makaligad sini, nakaangkon sang mainit nga pagbaisanay ang mag-amay tubtob sa nagkuha sang binangon si Jay-R kag ginlabo ang ulo sang iya amay.
Wala pa nakuntento, nagkuha pa ini sang bato kag ginlamposan pa ang biktima.
GIlayon naman nga gindangat sa ospital ang biktima antes gin-refer sa South Cotabato Provincial Hospital kag sa subong yara na sa maayo nga kahimtangan.
Samtang nagpalagyo naman ang suspek makaligad ginhimo ang krimen, rason nga nagapadayon ang pursuit operation sang Polomolok PNP.
Dugang ni Capt. Apostol, personal grudge ang ginalantaw nila nga motibo sa nasambit nga insidente.
