Ginkabig sang isa ka abogado nga maayo nga development ang pagbag-o sang liderato sa Senado sa idalom sang pagpanguna ni Senate President Sherwin Gatchalian, bangud nagahatag ini sang oportunidad para sa mas patas kag mas transparent nga pagdumala sang impeachment trial ni Bise Presidente Sara Duterte.
Sa exclusive interview sang Bombo Radayo Koronadal kay Atty. Luke Espiritu, Lawyer and Filipino Labor Leader, iya ginpahayag nga importante nga may yara sang “authentic appearance” kag impartial nga pagdumala ang Senate leadership agud mapakita nga ang tanan nga panig hatagan sang patas nga kahigayunan, lakip na si VP Sara Duterte nga makapahayag kag makasabat sa mga ebidensiya nga ipresentar batok sa iya.
Ginpabutyag man sang abogado ang kabalaka sa una nga posibilidad sang pagpangulo ni Sen. Alan Peter Cayetano sa impeachment trial bangud sa iya ginakabig nga pagkiling sa kampo ni Duterte, nga mahimo makaapekto sa pagsalig sang publiko sa proseso.
Apang ginpahayag niya nga kun ang proseso isa lang ka “numbers game,” dako ang posibilidad sang acquittal sa kaso sang bise presidente bangud kinahanglan ang two-thirds sang boto sang mga senador agud magresulta sa conviction apang nagasalig siya nga bangud sa bag-o nga liderato, mangin patas ang paglitis sa Bise Presidente.
Suno kay Atty. Espiritu, mas importante nga ang Senate leadership maghatag sang espasyo agud maguwa ang kamatuoran kag indi mapaidalom ang proseso sa interes sang bisan ano nga grupo, lakip ang ginatawag nga Duterte bloc.
