Pinalalawak pa ng mga awtoridad ang imbestigasyon kaugnay ng pagkamatay ng mga basketbolistang sina Rene Baterbonia at Divine Adili matapos ipatawag ng Philippine National Police – Criminal Investigation and Detection Group ang pangulo ng Ateneo de Manila University na si Roberto Yap.
Kinumpirma ni Jonvic Remulla na naglabas ng subpoena ang CIDG upang makuha ang panig ni Yap at mabigyang-linaw ang mga pangyayari na nauwi sa pagkasawi ng dalawang atleta.
Samantala, wala pang ibinibigay na detalye si Remulla kung kailan haharap sa mga imbestigador si Ateneo men’s basketball team manager Epok Quimpo, na isa rin sa mga personalidad na inaasahang makapagbibigay ng mahahalagang impormasyon sa kaso.
Nauna nang dumalo sa CIDG noong Hunyo 19 sina Ateneo head coach Tab Baldwin, coaching staff member Dean Castano, at athletic director Em Fernandez upang magbigay ng kanilang mga salaysay hinggil sa insidente.
Habang nagpapatuloy ang imbestigasyon, muling ipinahayag nina Baldwin at Yap ang kanilang paghingi ng paumanhin sa mga pamilya nina Baterbonia at Adili. Gayunman, nananatiling nakatuon ang mga awtoridad sa pagtukoy sa buong detalye ng pangyayari at sa posibleng pananagutan ng mga sangkot.
