Ginapaabot nga makabulig sa suplay sang langis sa pungsod ang desisyon sang negosyante nga si Enrique Razon Jr. nga baklon ang SierraCol Energy Limited, ang pinakadako nga independent oil kag gas exploration kag production company sa Colombia.
Ang kasugtanan gin-anunsyo sang Marso 11, 2026 sa London kag ginapaabot nga matapos ini sa sining una nga quarter sang tuig matapos makumpleto ang mga kinahanglanon nga regulatory approvals.
Paagi sa iya kompanya nga Prime Infrastructure Capital, ginapalapad ni Razon ang iya operasyon sa sektor sang enerhiya sa guwa sang Pilipinas.
Ang SierraCol responsable sa ginabanta nga 10 porsyento sang kabug-usan nga produksiyon sang langis sang Colombia, gani ginapaabot nga makahatag ini sang alternatibo nga suplay para sa Pilipinas tunga sang padayon nga kaguluhan sa Middle East nga nagaapekto sa pagsaka sang presyo sang langis sa pandaigdig nga merkado.
Suno kay Tony Hayward, executive chair sang SierraCol, handa na ang kompanya sa bag-o nga bahin sang pagtubo upod sa Prime Infrastructure. Dugang pa sang Carlyle Group, ang anay tag-iya sang SierraCol, nga napamatud-an na sang kompanya ang iya responsableng operasyon kag importante nga katuwang sang Ecopetrol, ang nasyonal nga oil company sang Colombia.
Bisan wala ginpahayag ang kabug-usan nga balor sang transaksyon, klaro nga ini isa ka estratehiko nga tikang agud masiguro ang mas mabakod nga suplay sang enerhiya para sa Pilipinas.
Sa karon, sensitibo gihapon ang merkado sang langis bangod padayon ang pagsaka sang presyo tungod sa tensyon sa Middle East.
Ang pagsulod ni Razon sa Colombian oil sector ginatan-aw nga isa ka importante nga tikang agud mapagaan ang epekto sang pandaigdig nga krisis sa enerhiya sa pungsod.
