Ginmanduan na ni Hon. Atty. Pao Evangelista, Alkalde sang Kidapawan City ang pamunuan sang Land Transportation Office (LTO) kag Highway Patrol Group (HPG) nga imbestigaran ang nagluntad nga BOSS Iron Man Challenge Cup 2026 sa diin naga pangatubang sang mga nanari sari nga mga kontrobersiya bangud sa nagkalain-lain nga disgrasya sa bilog nga Mindanao.
Sa syudad sang Kidapawan, naglapta online ang footage, makita nga may pila ka mga partisipantes nga naglapas sa traffic laws sa diin isa sa mga ini amu ang “Beating the Red light”.
Bangud sini, ginmando ni Mayor Evangelista nga imbestigaran sang mga ahensiya sang gobyerno ang mga paglapas sang pila ka mga partisipantes.
Ginpahayag man sini nga nagakadapat nga dulaon na sang gobyerno ang ginakabig nga VIP Treatment kag nagakadapat nga wala sang exemptions ang pagpatuman kag pag imposar sang layi sa pungsod.
Dugang pa sini, ginpahayag man sang alkalde nga bangud sa mga insidente nga ginaka-imbolbaran sang pila ka mga BOSS riders, indi na sini luyag pa nga malakip ang iya nga syudad sa mga ruta sang BOSS Iron Man Challenge Cup bangud tuman ka delikado ang nasambit nga aktibidad labi na sa mga residente sa syudad sang Kidapawan City.
