Ginpasiguro ni Agriculture Secretary Francisco Tiu Laurel Jr. nga bastante ang suplay sang pagkaon sa Pilipinas apisar pa sa pagsaka sang presyo sang petrolyo bangud sa nagapadayon nga kinagamo sa Middle East.
Suno sa Department of Agriculture (DA), bastante ang suplay sang pagkaon hasta Hunyo ukon Hulyo, lakip na ang 400,000 metric tons nga buffer stock sang bugas nga bastante para sa 10 ka adlaw.
Ginalauman man ang mas mataas nga suplay tungod sa anihan kag pag-abot sang imported nga bugas.
Nagpatuman ang gobyerno sang mga tikang agud mapabilin ang barato nga presyo, kasubong sang mas istrikto nga monitoring kag price cap sa imported rice.
Ginpasalig man sang ahensya nga bastante man ang suplay sang gulay, baboy, mais, asukal, kag sibuyas.
Bisan may pagsaka sang presyo bangud sa mataas nga gastos sa transportasyon, ginpahayag ni Presidente Ferdinand Marcos Jr. nga magapadayon ang programa nga P20 kada kilo sang bugas hasta Hunyo 2028 para sa mga benepisyaryo.
