ADS kag campaign materials sang political aspirants,indi pa mahilabtan sang COMELEC

Gin-athag sang Commission on Elections (Comelec) nga indi pa sila maka-aksyon batuk sa promotional materials sang mga personalidad para sa eleksyon sa 2025 bangud makabig pa lamang sila nga aspirants kag indi pa kandidato.

Suno kay Comelec Chairman George Erwin Garcia, nakahibalo sila sa nagakatabo angut sa mga promotional materials apang bilang ahensya, nagasunod sila sa layi kag kun ano ang ginamandu sang Korte Suprema.

Sa desisyon sang Supreme Court sang 2009, ginsiling nga ang kandidato ang liable lamang sa election offenses kun mag-umpisa na ang campaign period.

Bangud sini nga ruling, indi mahimo maka-file sang kaso ang Comelec kag indi man sini mapangkakas ang anuman nga promotional materials.