Nagpanawagan si Koronadal City Veterinarian Dr. Charlemagne Calo sa mga hog raisers nga magpabilin nga kalmado kag indi magpadala sang kahadlok bangud wala pa sang kumpirmado nga kaso sang African Swine Fever (ASF) sa syudad sang Koronadal.
Ginpahayag ni Dr. Calo, padayon ang ginahimo sang City Veterinary Office nga regular blood surveillance sa mga baboy kada bulan kag ang pinakahapos nga laboratory results halin Mayo tubtob Hulyo nagpakita nga negatibo sa ASF ang mga sample nga ginpaidalom sa testing.
Ginpabutyag man sang city veterinarian nga mas importante ang istrikto nga biosecurity measures agud malikawan ang pagsulod sang virus sa mga piggery.
Lakip diri ang paglimitar sang pagsulod sang mga tawo kag sapat sa kulungan, regular nga pag-disinfect sang lugar, paggamit sang footbath antes magsulod sa pigpen, pag-ilis sang tsinelas ukon bayo, kag pagpasiguro nga maayo ang bakod kag proteksyon sang mga hinuptan.
Samtang, ginpahayag ni Calo nga ginapabaskog man ang monitoring sa mga animal quarantine checkpoint sa mga entry kag exit points sang syudad. Ang tanan nga nagabiyahe sang mga sapat kinahanglan may kompleto nga travel permits, veterinary health certificates kag iban pa nga dokumento antes tugutan nga makasulod ukon makaguwa sa Koronadal.
Ginlaygayan man niya ang mga hog raisers nga kon may nagamasakit ukon nagakalamatay nga baboy, indi ini dapat taguon , kundi ipacheckyar dayon sa City Veterinary Office nga nagahatag sang libre nga konsultasyon kag monitoring.
Dugang pa ni Calo, may yara sang ayuda kag insurance programs nga mahimo mapahimuslan sang mga livestock raisers sa tion sang disease outbreak, lakip ang programa sang Philippine Crop Insurance Corporation (PCIC).
Sa katapusan, ginpasiguro sang opisyal nga wala sang rason nga magpanic ang publiko sa sini nga tion, kag gin-aghat ang tanan nga magpadayon sa maayo nga pagdumala kag pag-atipan sang ila mga hinuptan nga baboy agud malikawan indi lamang ang ASF kundi pati ang iban pa nga mga sakit.
