-- ADVERTISEMENT --

Ginatun-an sang Department of Energy (DOE) ang posibilidad nga magpatukod sang Strategic Petroleum Reserves (SPR) paagi sa pribado nga pamuhunan agud mapabakod ang seguridad sang suplay sang lana sa Pilipinas.

Ini ang nangin sentro sang pagpakigpulong ni DOE Undersecretary Alessandro O. Sales sa mga representante sang isa ka pribado nga mamumuhunan, kaupod ang opisina ni Senador Erwin T. Tulfo.

Ginpahayag sang kagawaran nga natalakay sa miting ang dugang nga teknikal nga pagsusi kag pagbinuligay sang nagkalain-lain nga ahensya sang gobyerno agud matimbang ang mga ginpresentar nga panukala.

Apang, gin-athag sang DOE nga kinahanglan pa nga magpaidalom sa masinop nga ebalwasyon kag pagsunod sa mga regulasyon sang gobyerno ang mga proyekto antes ini maaprobahan kag mapatuman.

Kun matigayon, ginapaabot nga makabulig ang nasambit nga pamuhunan sa pagpalig-on sang reserba sang lana sang pungsod, ilabi na sa tion sang posible nga pagkauntat ukon pagka-antala sang suplay sa pandaigdig nga merkado.

Ginapaabot man nga makahatag ini sang mas masaligan nga suplay sang enerhiya para sa mga panimalay, negosyo kag nagkalain-lain nga industriya sa Pilipinas.