Nagapabilin nga malinong ang sitwasyon sa palibot sang Bangsamoro Government Center, samtang nagapadayon ang pagpanghanda para sa pinakauna nga session sang 80 ka miyembro sang Bangsamoro Parliament.
Suno kay 6th Infantry Division Spokesperson LTCOL. Ronald Suscano, base sa ila monitoring, malinong ang kahimtangan kag wala sang madamo nga salakyan nga nagalabay sa mga dalan. Sa interview sang Bombo Radyo Koronadal, ginpahayag niya nga bisan pa sa indi maayo nga kondisyon sang panahon, handa ang mga awtoridad sa pagsiguro sang seguridad para sa nasambit nga aktibidad.
Dugang pa niya, may pila na ka miyembro sang parliament nga nagapaabot kag nagakadto sa Bangsamoro Government Center, kun sa diin pagahiwaton ang una nga session.
Ginpaathag man ni Suscano nga isa lamang ka adlaw ang nakatalana para sa session, kun sa diin pagabotohan sang mga miyembro ang mapilian nga Chief Minister. Pagkatapos sini, ang napilian nga Chief Minister amo ang magapili sang mga lider sang nagkalain-lain nga ministries sa idalom sang BARMM.
Ginalauman man nga magahisgot ang mga opisyal sang mga proyekto kag programa nga nagatutok sa kaayuhan sang katawhan sa rehiyon.
Sa pihak sini, ginpasiguro ni Suscano nga wala sang natumod nga hulga ukon insidente nga mahimo makabalabag sa paghiwat sang pinakauna nga session sa Bangsamoro Government Center.
