Nagpaandam si Atty. RJ Sustiguer, presidente sang South Cotabato Chamber of Commerce and Industry, nga mahimo magamay ang pondo para sa nagapanguna nga mga serbisyo sang gobyerno bangud sa nagadaku nga obligasyon sa pagbayad sang utang kag interes sini.
Sa interview sang Bombo Radyo Koronadal, ginpahayag ni Sustiguer nga isa sa mga rason sang padayon nga pagpangutang sang pungsod amo ang mas daku nga paggasto sang gobyerno kon ikumparar sa kita sini.
Dugang pa niya, nakaapekto man sa kita sang gobyerno ang maluya nga koleksyon sang buhis, nga gin-angot niya sa kakulang sang pagsalig sang pila ka taxpayers sa husto nga paggamit sang ila ginabayad. Suno sa iya, mahimo magtaas ang pagsunod sang publiko sa pagbayad sang buhis kon makita nila ang kaangay nga kalidad sang serbisyo.
Ginpaandaman man niya nga kon magdamo ang mga risgo sa ekonomiya sang Pilipinas, mahimo magtaas ang interes sa pagpangutang halin sa international financial institutions kag magdugang ang pinansyal nga kabug-aton sang pungsod.
Samtang, ginlaygayan ni Sustiguer ang publiko nga mangin mas responsable sa pagdumala sang personal nga kwarta, likawan ang indi kinahanglanon nga gastos kag mag-usisa sang dugang nga pagka-kitaan, pareho sang online jobs kag virtual assistance.
Gindugang niya nga sa tunga sang nagataas nga presyo sang mga balaklon, importante ang pagtipid, pagpauswag sang personal nga ikasarang kag pagpanikasog sa dugang nga income.
Suno sa iya, dapat mag-upod ang responsable nga paggasto sang gobyerno kag personal nga fiscal discipline agud maatubang ang mga paghangkat sa ekonomiya.
