Padayon nga nagasaka ang presyo sang mga produktong petrolyo sa world market bangud sa kawalay kasiguruhan nga dala sang nagbalik nga tensyon sa Middle East.
Sa Pilipinas, dugang nga nagapabug-at sa pagsaka sang presyo sang krudo ang paghina sang piso kontra dolyar sang Estados Unidos.
Base sa ikaduha nga adlaw sang trading halin Oktubre 26 tubtob 27, nagtaas na sang P3.99 kada litro ang diesel, P1.64 ang gasolina, kag P1.50 naman ang kerosene.
Suno kay Jetti Petroleum President Leo Bellas, isa sa mga panguna nga rason sang daku nga pagsaka sang presyo amo ang pagnubo sang bili sang piso kontra dolyar.
Apang may tatlo pa ka adlaw nga trading nga mahimo makaapekto sa final nga pagbag-o sang presyo.
Gani, posible pa nga magdaku ukon magamay ang price adjustment nga ipatuman sa masunod nga semana.
