Magapatuman ang Metropolitan Manila Development Authority (MMDA) sang temporaryo nga pagdili sa pag-ukay kag pagkay-o sang mga dalan halin Nobyembre 1 tubtob sa tungang gab-i sang Disyembre 23 agud malikawan ang mabug-at nga trapiko sa Metro Manila.
Tuyo nga mapabilin nga hapsay ang dalagan sang trapiko samtang nagapanghanda ang pungsod para sa ika-49 nga Association of Southeast Asian Nations (ASEAN) Summit sa Nobyembre 16 tubtob 18, kag sa pagdamo sang mga motorista kag mamalitay sa panahon sang Paskwa.
Suno kay MMDA Chair Don Artes, ginmanduan na sang ahensya ang mga kinauukulan nga temporaryo nga untaton ang mga roadwork, luwas lamang kon kinahanglan gid ini nga himuon.
Sakop man sang mando ang mga lugar sa guwa sang mga venue sang ASEAN Summit bangud mahimo gihapon makaapekto sa dalagan sang trapiko ang mga pag-ukay, ilabi na sa pagpatuman sang mga alternatibo nga ruta.
Ginapaabot sang MMDA nga paagi sa sini nga tikang, maminusan ang abala sa mga motorista kag mapabilin nga hapsay ang pagbyahe sa Metro Manila sa tion sang summit kag celebrasyon sang Paskwa.
