Nagpatupad ng curfew sa ilang lugar sa Paris at iba pang lungsod sa France kasunod ng mga kaguluhan at pagnanakaw nitong weekend na nagdulot ng pinsala sa mga negosyo at pagkasugat ng mga pulis.
Kabilang sa mga lungsod na nagpatupad ng mga paghihigpit ang Marseille, Bordeaux, Nice, Lyon at Lille. Sa ilang bahagi ng Paris, ipinagbawal ang paglabas mula alas-11 ng gabi hanggang alas-6 ng umaga, lokal na oras.
Mahigit 2,500 katao ang naaresto at tinatayang 1,000 pulis ang nasugatan. Nagsimula ang mga protesta noong nakaraang buwan sa panawagan ng mga estudyante para sa mas maayos na kondisyon sa mga paaralan, bago lumawak ang mga hinaing ng mga demonstrador.
Ayon kay Prime Minister Sébastien Lecornu, binigyan ang mga lokal na alkalde ng kapangyarihang magpatupad ng curfew depende sa sitwasyon. Nangako rin ang pamahalaan ng tulong sa mga negosyong napinsala at mga manggagawang hindi nakapasok dahil sa kaguluhan.
Mahigit 2,000 negosyo ang naapektuhan, na may tinatayang pinsalang aabot sa daan-daang milyong euro. Patuloy namang sinusuri ng mga imbestigador ang mga kuha ng CCTV upang matukoy ang mga hinihinalang sangkot sa karahasan.
