Ginpakigbahin ni Tantangan Mayor Timee Torres Gonzales ang kalipay nga iya nabatyagan bangud mahatagan na sang tion ang banwa sang Tantangan nga makaangkon sang kaugalingon sini nga District Hospital.
Sa interview sang Bombo Radyo Koronadal kay Mayor Gonzales, iya ginpahayag nga ginakabig niya nga “answered prayer” ang pagpatindog sang nasambit nga balay bulungan bangud mas mangin malapit na ang access sang mga pumuluyo nga nagakinahanglan sang medikal nga atensyon.
Sa dugang, ginpahayag man ni Gonzales nga Php 50M ang ginpain nga pondo nga halin sa Melco Resorts Foundation agud mapatindog ang nasambit nga infirmary hospital.
Madumduman nga kabug-usan ₱200 milyones ang ginpain sang Melco Resorts Foundation para sa mga health services sa probinsya sang South Cotabato.
Lakip diri ang ₱100 milyones para sa pagpalapad sang South Cotabato Provincial Hospital bilang tatlo ka panalgan nga pasilidad, ₱50 milyones para sa Koronadal City Infirmary, kag ₱50 milyones para sa pagpatindog sang Tantangan District Hospital.
