Ginpahanumdom ni Police Major Mark Gerald Norbe, Chief of Police Operations sang Regional Cybercrime Unit 12, ang mga ginikanan kag ang bug-os nga komunidad nga magbinuligay sa pagsiguro sang seguridad sang mga kabataan kasunod sang nagluntad nga shooting incidents sa pila ka mga buluthuan sa probinsya sang South Cotabato.
Sa interview sang Bombo Radyo Koronadal, ginpahayag ni Norbe nga dapat mangin wake-up call sa tanan ang nasambit nga mga insidente, bangod indi lamang Philippine National Police (PNP) kag Department of Education (DepEd) ang responsable sa paggiya kag pagproteher sa mga estudyante.
Dugang pa niya, importante ang aktibo nga pagmonitor sang mga ginikanan sa ila mga kabataan, ilabi na sa paggamit sang social media, nga mahimo magamit sa pagpamahog ukon iban pa nga aktibidad nga makabutang sa ila sa peligro.
Ginpahanumdom man ni Norbe nga indi dapat mangin rason ang pagkabusy sa trabaho agud mapabay-an ang mga kabataan. Kinahanglan nga hatagan sila sang bastante nga tion agud mahibaluan ang ila mga ginaobra, mga kaupod, kag mga aktibidad sa internet.
Gani, gin-awhag niya ang mga ginikanan nga maghatag sang nagakaigo nga laygay kag paggiya sa ila mga kabataan, samtang ginapanawagan man ang kooperasyon sang mga opisyal sang gobyerno kag sang bug-os nga komunidad agud malikawan ang posible nga peligro sa sulod sang buluthuan kag online platforms.
