Wala pa sang natalana nga pagsaka sang presyo sa mga panguna nga balaklon kag prime commodities, lakip na ang “BOTTLED WATER”, bisan pa sa ginapaabot nga epekto sang Super El Niño sa Pilipinas.
Ini ang ginpasalig ni Department of Trade and Industry (DTI) Secretary Maria Christina Roque, nga suno sa iya wala pa sila nakabaton sang bisan ano nga request halin sa mga manufacturer para sa pagsaka sang presyo sang mga panguna nga produkto.
Suno kay Roque, bastante pa ang suplay sang mga balaklon sa merkado kag padayon ang pagmonitor sang ahensya, upod ang koordinasyon sa mga manufacturer, agud mapabilin nga estable ang presyo kag suplay sang mga produkto.
Gin-agda man sang kalihim ang publiko nga likawan ang panic buying ukon sobra nga pagtipig sang mga balaklon, bangod mahimo ini magresulta sa kakulang sang suplay sa merkado.
Samtang, may kaangtanan sa nagahilapit nga holiday season, ginpahayag sang DTI nga wala pa man sang naitalang pagbag-o sa presyo sang mga produkto nga kinaandan nga ginabakal para sa Paskwa, bangod padayon pa nga nakatutok ang ahensya sa pagmonitor sang presyo sang mga panguna nga balaklon.
