Pormal na umapela ang United Bangsamoro Justice Party (UBJP) sa Commission on Elections (COMELEC) na ideklarang failure of election ang ilang polling places at precincts sa 2nd Parliamentary District ng Cotabato City, kasunod ng serye ng naiulat na karahasan, intimidation at umano’y mga iregularidad sa isinagawang Bangsamoro Parliamentary Elections ngayong araw.
Sa liham na ipinadala kay COMELEC Chairperson George Erwin M. Garcia, hiniling ng partido na magsagawa ng masusing imbestigasyon sa mga insidenteng umano’y nakaapekto sa seguridad ng mga botante at sa integridad ng proseso ng pagboto.
Kabilang sa mga iniulat ng UBJP ang isang grenade explosion sa Purok Amirol, Barangay MB Kalanganan; shooting incident sa Bagua II na iniulat na ikinasawi ng tatlo at ikinasugat ng pito; at isa pang pamamaril sa Central Pilot School na iniulat namang ikinasugat ng apat na katao.
Ayon sa partido, maaaring nakaapekto ang mga insidenteng ito sa malayang pagpapasya ng mga botante, gayundin sa kakayahan ng mga poll watcher na maayos na mamonitor ang aktuwal na proseso sa mga polling place.
Hindi lamang mga insidente ng karahasan ang ipinasisiyasat ng UBJP. Inireklamo rin nito ang umano’y pagkakaroon ng pre-shaded o pre-marked ballots, kabilang ang mga balotang sinasabing may marka bago pa man maibigay sa botante, gayundin ang umano’y pagmamarka ng balota ng ibang indibidwal at hindi pag-aksyon sa ilang objection na inihain kaugnay nito.
Hiniling ng partido sa COMELEC na siyasatin ang mga balota at kaugnay na election documents, kabilang ang ballot accounting records, minutes of voting at election returns, upang matukoy kung may mga kuwestiyonableng boto na posibleng naisama sa opisyal na bilang.
Kasama rin sa reklamo ang mga alegasyon ng flying voters at unauthorized voting, kabilang ang umano’y paggamit ng voter information ng ibang tao at pagboto ng mga indibidwal na sinasabing hindi lehitimong rehistrado sa mga concerned precinct.
Gayunman, nilinaw ng UBJP na hindi nito awtomatikong itinuturing na failure of election ang bawat insidenteng naiulat. Sa halip, nais nitong suriin ng COMELEC ang kabuuang epekto ng mga insidente at alegasyon upang matukoy kung nanatiling malaya, tunay at mapagkakatiwalaan ang proseso ng pagboto sa mga apektadong lugar.
Inihain ng UBJP ang kahilingan nito sa ilalim ng Section 6 ng Omnibus Election Code. Nilagdaan ang liham ni Atty. Lanang T. Ali, Jr., Legal Committee Chairperson ng partido.
Nananatili namang nasa COMELEC ang pinal na pagpapasya kung may sapat na batayan upang ideklarang failure of election ang alinmang polling place o precinct.
