Nag-anunsyo ang Canada sang counter-tariffs nga magaabot sa 50% sa halos C$28 bilyon nga balor sang mga produkto nga gin-aangkat halin sa United States bilang balos sa bag-o nga mga buhis nga ginpatuman ni US President Donald Trump.Suno kay Finance Minister François-Philippe Champagne, mangin epektibo ang amo nga mga taripa sa Setyembre 8 kag magalakip sa mga produkto pareho sang bakal, muwebles kag bayo. Ginpahayag niya nga ini nga tikang ginahimo agud maprotektahan ang mga trabahador kag negosyo sa Canada batok sa epekto sang nagadaku nga tensyon sa patigayon.
Nagtuga ang tensyon matapos mapakyas ang negosasyon sa patigayon sa tunga sang Canada kag United States. Nagbayluhanay ang duha ka panig sang akusasyon tuhoy sa mga kahingyo nga ginakabig nila nga indi makatarunganon.Samtang, gin-aprobahan sang gobyerno sang Canada ang C$7.5 bilyon nga bulig para sa mga lokal nga industriya agud mabuligan sila nga maatubang ang epekto sang mga taripa kag malikawan ang malapad nga pagkawala sang trabaho.Sa pihak nga bahin, ginpahayag sang White House kag ni Trump nga ang Canada amo ang nangin “unreasonable” sa mga negosasyon. Si Prime Minister Mark Carney naman nag-akusar sa US nga ginatuyo sini nga paluyahon ukon gub-on ang importante nga mga industriya sang Canada.
Nagpabilin nga mataas ang kabalaka sa posibilidad sang pagsaka sang presyo sang mga produkto sa duha ka pungsod. Nag-atubang man sang peligro ang palaabuton sang USMCA free trade agreement samtang nagapadayon ang tensyon kag pagbayloay sang mga taripa sa tunga sang Canada kag United States.
