Ginpahayag sang Syria nga nagalaum ini nga magapadayon liwat ang negosasyon sini sa Israel angot sa isa ka kasugtanan sa seguridad nga tinutuyo nga mapahalin ang mga puwersa sang Israel sa ila teritoryo.
Ginhatagan ni Syrian Foreign Minister Asaad al-Shaibani sang panawagan ang Israel nga gamiton ang sini nga kahigayunan para sa diplomasya.
Apang ginpabutyag niya nga ang panguna nga prayoridad sang Damascus amo anay ang pagpauntat sang mga pag-atake sang Israel.
Kasamtangan nga may presensya gihapon ang mga puwersa sang Israel sa bahin sang Syria, kasunod sang pagkaperdi sang rehimen ni Assad sang 2024.
Samtang, naglala pa ang tensiyon sang ginbombahan sang militar sang Israel ang Abu al-Duhur airbase bangod sa alegasyon nga gamiton ini sang Turkey.
Apang matigdas ini nga ginpanginwala sang Syrian government.
Suno kay Shaibani, bisan pa nga nagkasugtan na sadto ang pagpatukod sang mga buffer zone sa idalom sang United Nations, nagalikaw sa gihapon ang Israel sa pagtuman sang amo nga kasugtanan.
Bisan kulang ang pagsalig sang Syria sa Israel, nagalaum gihapon ang Damascus nga ang pag-ipit sang Estados Unidos makabulig sa pagbalik sang duha ka panig sa pormal nga negosasyon.
