Hugot nga ginpanginwala ni House Appropriations Committee Chairperson kag Nueva Ecija Rep. Mikaela Suansing ang alegasyon nga may yara sang budget insertions ukon pork barrels ang pila ka mga mamalidha, partikular ang mga katapo sang House prosecution panel.Suno kay Suansing, imposible nga may yara sang budget insertions ang mga kongresista sa ginaduso nga 2027 national budget bangud bag-o lang ginsumiter sa Kamara ang 2027 National Expenditure Program (NEP) kag wala pa ini ma-review sang mga mamalidha.
Gin-athag ni Suansing nga ang Executive Branch amo ang responsable sa paghimo sang NEP antes ini isumiter sa Kongreso para sa pagreview kag deliberasyon.Ginhatagan man pagtamod sang House Appropriations Committee chair nga mabudlay nga makaangkon sang congressional insertions sa 2026 national budget bangud sa mga reporma nga ginpatuman agud mangin mas hugot kag hayag ang proseso sang hearing kag deliberation sa national funds.
Ini nga pahayag ni Suansing ang kasunod sang alegasyon ni Baguio City Mayor Benjamin Magalong nga ang mga mamalidha lakip na ang pila ka mga miyembro sang prosecution panel ang gin-alegar may kahilabtanan sa budget insertions.Samtang, nagsugod na ang proseso para sa 2027 national budget matapos nga nagsumiter sang budget proposal ang senado nga nagabalor sang P7.2 trillion.Natalana nga magasugod ang budget hearings sa Agosto 27.
