Nagpreparar ang Department of Social Welfare and Development (DSWD) sang 5 milyon ka Family Food Packs (FFPs) nga handa ipanghatag sa mga pamilya nga apektado sang pagbaha kag iban pa nga kalamidad.
Suno kay DSWD Assistant Secretary Irene Dumlao, ginapundo ang mga food packs sa nagkalain-lain nga disaster resource hubs sa bug-os nga pungsod agud mas madasig ang pagpanagtag kun kinahanglanon.
Masobra 805,000 ka box ang yara sa Luzon Disaster Resource Center sa Pasay City, masobra 475,000 sa Visayas Disaster Resource Center sa Mandaue City, Cebu, kag masobra 196,000 sa Mindanao Disaster Resource Center sa Butuan City.
Ang isa ka Family Food Pack mahimo makasuplay sang pagkaon para sa pamilya nga lima ka miyembro sa sulod sang duha tubtob tatlo ka adlaw.
Nagpreparar man ang DSWD sang P1.6 bilyon nga standby funds para sa disaster response operations, samtang naka-standby man ang ila quick response teams kag mga kagamitan bangud sa padayon nga pagmonitor sang panahon kag duha ka tropical depression sa guwa sang Philippine Area of Responsibility.
