Ginpahayag ni anay Surallah Mayor kag abogado nga si Atty. Antonio Bendita nga ang alegasyon nga may grave threats si Vice President Sara Duterte batok kay President Ferdinand “Bongbong” Marcos Jr., First Lady Liza Araneta-Marcos, kag Former House Speaker Martin Romualdez, kinahanglan anay suportahan sang mabaskog kag klaro nga ebidensya.
Sa iya interview sa Bombo Radyo Koronadal, ginpunto ni Bendita nga dapat mapamatud-an anay kun matuod nga may gin-contact gid si VP Sara nga tawo agud magpatay sa Presidente.
Suno sa iya, indi igo ang mga akusasyon lang bangud ang bisan ano nga kaso kinahanglan nagaangkla sa kamatuoran, ebidensya, kag yara sa legal nga proseso.
Gindugang pa ni Bendita nga ang kredibilidad sang testigo kag ang pagkabagay sang iya mga pahayag importante sa pag-usisa sang kaso.
Kinahanglan nga ang testimonya klaro, naga-angot, kag may suporta halin sa iban pa nga ebidensya agud maghatag sang basehan para sa probable cause.
Suno pa sa abogado, ang pagdumala sang hustisya kinahanglan indi magbase sa haka-haka ukon sa politika, kundi sa mga ebidensya nga mapamatud-an sa hustong proseso.
