Padayon ang impeachment trial ni Vice President Sara Duterte sa Hulyo 6 bisan pa sa isyu sang selyado nga kahon sang dokumento halin sa Bureau of Internal Revenue (BIR).
Suno kay Senate Secretary kag impeachment court clerk Atty. Renato Bantug Jr., wala sang rason nga maapektuhan sang amo nga isyu ang nakatalana nga pagsugod sang hearing.
Nagalakip ang selyado nga kahon sang income tax return ni VP Sara Duterte kag sang iya bana nga si Atty. Manases Carpio.
Nag-umpisa ang kontrobersiya matapos ginpangayo sang House prosecution panel sa ginpatigayon nga pre-trial conference nga buksan kag markahan ang kahon bilang kabahin sang ila mga ebidensya.
Samtang, ipagwa sa Hunyo 29 ang pre-trial order sang impeachment court nga magalakip sang mga nasugtanan sang prosekusyon kag depensa, lakip ang mga kamatuoran nga wala na ginadiskusyonan, listahan sang mga testigo, kag iskedyul sang hearing.
Nahibaluan man nga tatlo ka adlaw ang duha ka panig, ukon tubtob Hulyo 2, agud magpasaka sang ila mga komento sa amo nga pre-trial order.
