Ginpaklaro sang Department of Social Welfare and Development Region XII nga limpyo, edible ukon makaon, kag indi daan ang ginpanagtag sang ahensya nga bugas sa mga apektado sang pagtay-og sa rehiyon.
Sa exclusive interview sang Bombo Radyo Koronadal kay Regional Director Loreto Cabaya Jr. sang Department of Social Welfare and Development Region XII, iya ginpaathag nga indi matig-a ang bugas nga nabaton sang mga benipesyaryo kag ang nakit-an sa video ang bangud sa naka-vaccuum sealed ini.
Suno sa direktor, posible nga daan na nga video ang nagalapta nga video sa social media kag ginpost lang sang mga vlogger ukon indibdiwal nga luyag makakuha sang madamo nga views sa social media.
Gindepensahan man ni Cabaya ang efforts kag wala untat nga pagserbisyo sang mga katapo sang ahensya agud magbulig kag magpalab-ot sang suporta sang mga apektado sang kalamidad.
Bangud sini, nagapanawagan si Cabaya sa publiko nga mahimo magpalapit sa ila talatapan kun may mga problema ukon concerns agud gilayon ini nga maaksyunan sa baylo nga magpost sa social media.
