KORONADAL CITY – Wala na sang kabuhi ang isa ka 35-anyos nga motorista matapos ini nag-overshoot kag nabunggo sa isa ka balay kaina sang kaagahon, May 9, sa Provincial Road, Barangay Topland sini nga syudad.
Ginkilala ang biktima nga si alyas nga “Ranz”, residente sang Barangay Cacub, Koronadal City.
Sa inisyal nga imbestigasyon sang kapulisan, pasado ala-una sang kaagahon (1:10 AM) sang nagluntad ang aksidente samtang gina-subay sang biktima ang dalan papuli sa Brgy. Cacub sakay sang iya Kawasaki ZTX1000W motorcycle nga may plate number 783LEK.
Pag-abot sa nasambit nga lugar, nag-overshoot ini sa kurbada nga parte sang dalan nga gintunaan sang pagkabunggo man sini sa isa ka balay.
Bangud sa kabaskugon sang impact, nag-angkon sang seryoso nga pilas sa lawas ang biktima.
Gindala pa ini sa South Cotabato Provincial Hospital agud dapatan sang pagbulong, apang gindeklarar ini nga Dead on Arrival sang doktor.
Sa karon, liwat nga nagapahanumdom ang mga otoridad sa mga motorista nga mangin alerto kag maghinay-hinay sa pagmaneho ilabi na kon madulom ang dalan kag may mga kurbada agud malikawan ang kaangay sini nga trahedya.
