Masobra 100 ka Pilipino halin sa United Arab Emirates kag Israel luwas nga na-repatriate pabalik sa Pilipinas sang Abril 18, suno sa Department of Migrant Workers (DMW), sa tunga sang nagapadayon nga tensyon sa Middle East.
Suno sa DMW, kabug-osan nga 123 ka mga Pilipino ang nag-abot sa duha ka batch sang Sabado.
Sa mga halin sa UAE, 101 ka indibidwal ang nakabalik sa Manila pinaagi sa voluntary repatriation program, nga ginalakipan sang 80 ka overseas Filipino workers (OFWs) kag 21 ka dependents.
Ginsugat sila sang mga representante sang Department of Migrant Workers, Overseas Workers Welfare Administration, kag Department of Social Welfare and Development, kag ginhatagan sang psychosocial support sang Department of Health.
May gin-offer man nga livelihood kag skills programs halin sa Department of Trade and Industry kag Department of Labor and Employment para sa ila reintegration.
Sa isa pa ka batch, 22 ka OFWs halin sa Israel ang nag-abot man sa Manila, lakip ang mga caregiver kag hotel workers.
Ginbuligan sila sang Philippine Embassy kag OWWA sa pagtabok sa Taba Border Crossing antes maglupad pa-Pilipinas.
Suno sa gobyerno, padayon ang suporta para sa mga narepatriate pinaagi sa training, livelihood assistance, medical support, kag iba pa nga reintegration programs agud mabuligan sila makabalik sa trabaho kag normal nga kabuhi sa Pilipinas.
