Kontrolado ang sitwasyon sa Estados Unidos kag wala sang dapat ikabalaka ang mga pamilya sang mga OFWs.
Ini ang nangin pahayag ni Pinoy Gonzales, Bombo International News Correspondent to USA, sa exclusive interview sang Bombo Radyo Koronadal.
Suno kay Gonzales, nagapabilin alerto ang Estados Unidos kag nagabantay sa pag-intercept sang posible nga missile attack bilang retaliation halin sa Iran.
Gindugang pa niya nga antes pa ang operasyon, ginpaandaman na sang Amerika ang mga opisyales sang Iran nga tumanon ang ila mga kasugtanan, apang wala ini nasunod, gani nagdesisyon ang duha ka pungsod nga himuon ang ginplano nga atake.
Ginpahayag pa niya nga seryoso si US President Donald Trump sa iya mga pagpaalinton kag ginapakita ang determinasyon nga proteheran ang pungsod.
Ginpanawagan man ni Gonzales sa mga Pilipino nga indi magkahadlok, bangud ang Pilipinas yara sa malayo kag ang tanan nga tikang ginahimo sa organisado kag husto nga paagi agud masiguro ang kaluwasan sang tanan.
