Kinumpirma ni Senate President Pro Tempore Panfilo Lacson na papalitan si Senador Imee Marcos bilang chairperson ng Senate Committee on Foreign Affairs, na inaasahang mangyayari sa susunod na linggo.
Ayon kay Lacson, posibleng naiparating na ng Senate Majority Leader na si Juan Miguel Zubiri ang desisyon kay Pangulong Ferdinand Marcos Jr.
Lumitaw rin ang pangalan ni Senador Erwin Tulfo bilang posibleng italagang kapalit ni Marcos sa naturang posisyon.
Samantala, pumayag si Senador Kiko Pangilinan na si Imee Marcos ang humalili sa kanya bilang chairperson ng Senate Committee on Constitutional Amendments and Revision of Codes bilang isang “gesture of goodwill.”
Nilinaw ni Lacson na wala siyang kinalaman sa pagpapalit ng mga committee chairmanship at itinanggi ang anumang personal na motibo sa desisyon, sa kabila ng mga naunang isyu at batikos na iniuugnay kay Senador Marcos kaugnay ng isyu ng West Philippine Sea at ugnayan ng Pilipinas sa China.
