KORONADAL CITY – Masobra sa 500 ka pamilya ang nagbakwit kag nagapabilin sa mga evacuation centers sa banwa sang Kalamansig sa probinsiya sang Sultan Kudarat bangud sa asod-asod nga pagtay-og nga napagkit, kun sa diin ang pinakamakusog ang naglab-ot sa Magnitude 5.3.
Ini ang ginkumpirmar ni Beverly Anne Santos, Information Officer 2 sang Office of the Civil Defense (OCD) Region 12, sa interview sang Bombo Radyo Koronadal.
Suno kay Santos, sa ginpaguwa nga datos sang PHIVOLCS, nakarekord sila sang 400 ka pagtay-og halin sang Enero 19 tubtob subong. Gani, ginpaandaman sang mga ini ang mga residente sa baybayon nga magpabilin nga alerto sa posibilidad sang tsunami.
Dugang pa sang OCD-12 nga ang mga evacuees naghalin sa mga barangay sang Sta. Clara, Baliwasan, Pag-asa, Sta. Maria, kag iban pa nga apektado nga lugar sa Kalamansig. Naeksperyensyahan man ang linog sa mga banwa sang Lebak, Palimbang, Esperanza, kag sa syudad sang Tacurong.
Samrang, tubtob sa karon suspendido ang klase sa pila ka eskwelahan, lakip ang Datu Giabar Pilot Elementary School kag Sta. Clara National High School, kag ginpatuman man ang suspensyon sang trabaho sa pila ka government offices sa Kalamansig, Lebak, kag Palimbang.
Kaangot sini, ginpasiguro sang Provincial Disaster Risk Reduction and Management Office, kaupod ang DSWD 12, OCD 12, Provincial Engineering Office, kag DPWH Sultan Kudarat District Office ang paghatag sang pagkaon, non-food items, kag paggamit sang heavy equipment para sa emergency response.
Nagpanawagan man ang Provincial Government sa publiko nga magpabilin nga kalmado, alerto, kag sundon ang mga pahanumdom sang lokal nga awtoridad, labi na ang mga yara sa baybayon.
