Ginpasiguro sang Department of Social Welfare and Development (DSWD) nga magapadayon ang Ayuda Para sa Kapos sa Kita (AKAP) bisan wala sang alokasyon nga para sa 2026 national budget.
Suno kay Budget Secretary Amenah Pangandaman, may nabilin pa nga ₱11 bilyon nga posible magamit tubtob 2026.
Bisan nangin kontrobersyal ang AKAP matapos tawgon ini nga ‘bagong pork barrel’ sang pila ka mamalidha, ginpanindugan sang DSWD na sila lang ang may gahom nga magpanagtag sang ayuda sa mga kapos nga mga pamiyang nagakinahanglan.
Suno naman kay DSWD Secretary Rex Gatchalian, parte sa gihapon ang AKAP sang ila nga mga programa.
Padayon man ang pagpatuman sang iban pa nga bulig patas sang Assistance to individuals in Crisis Situations (AICS) kag emergency cash transfers para sa mga biktima sang kalamidad.
Ginpahayag ni Sec. Pangandaman nga nakadepende na sa Kongreso kung liwat tagaan sang alokasyon ang AKAP para sa masunod nga tuig.
Mahibal-an nga may ₱220 bilyon nga kabug-usan nga pondo ang DSWD para sa 2026.
