Nadiskubre sang isa ka residente ang isa ka fragmentation hand grenade sa Barangay Lamhaku, T’boli, South Cotabato sang aga sang Abril 28, 2025.
Ginkilala ang nagreport nga si alyas “Jonathan”, barangay chairman kag residente sang nasambit nga lugar.
Suno sa iya, nakita niya ang isa ka unit sang fragmentation hand grenade sa kilid sang likod balay niya malapit sa suba, gani gilayon siya nga nagpadulong sa T’boli Municipal Police Station agud ipaabot ang natukiban.
Gilayon nga nagresponde ang alert team kag imbestigador sang T’boli MPS kag nagkadto sa lugar upod kay Jonathan.
Didto nila nakita ang ginaduda nga granada.
Pag-abot sang alas 10:00 sang aga, nangayo sang bulig ang kapulisan sa Explosive Ordnance Disposal (EOD) unit sang South Cotabato. Pag-abot sang EOD personnel sang mga alas 2:10 sang hapon, gin-identify nila ang bomba nga isa ka fragmentation hand grenade, M67 isa ka sahi sang mataas nga explosive.
Ginpatigayon sang mga EOD personnel ang Render Safe Procedure (RSP) sa lugar mismo sang alas 5:00 sang hapon kag gin-detonar ang nasambit nga explosive sa gilid sang suba.
Ginasiling nga posible nga ang granada ginlubong sang wala pa nakilala nga persona, kag sang tuman kabaskog sang ulan, gin-anod ini sang baha pakadto sa lugar kun sa diin ini nakita.
Padayon ang imbestigasyon sang mga otoridad kun diin kag paano ini nagtupa sa nasambit nga lugar.
